Lia fuan desmobilizasaun ne'e atu buka tesi ita Povo Maubere kik no kiak nia ainklor bahinra Nain Ulun Imorais sira buka halakun ita nia Asuwain Falintil no Veteranos sira hodi intensaun a'at hakarak buka hanean ita nafatin to'o ikus mai hakarak halo ita sudur no atan babbeik to ita mate deit hotu i la iha tan ita nia lia tatoli kona ba patriotismo no nasionalismo bele halerik tan iha ita nia Rai doben Timor Lorosae nia laran hodi fanu nafatin ita nia Povo kik no kiak Maubere nia espirito nasionalista no patriota...

 

PARTE I

 

Falintil Asuwain, Povo no Juventude Maubere,liafuan portuges dean "Desmobilizacão" ne'e ita hotu hatene nia signifikadu saida lós? Desmobiliza ne’e dean katak atu Halakun buat ida! Iha kasu konkretu ida ne’e, ukun nain sira husi AMP hakarak lós saida? Sira ne’e mesak asu nurak kolonialistas no neokolonialista ninia atan sira, nune sira buka defende ema a’at sira nia interesse dari pd ita Povo kik no kiak Maubere nia interesse. Nune kaso konkreto kona ba Falintil no Veteranos sira, ema a’at nain ulun sira buka hodi halakun Falintil no Veterranos nia naran no actividade para sira bele hala’o nafatin sira nia planos hodi hanean, no susu ita bokor no Rai bokor iha ita nia rai doben Timor Lorosae nia laran tomak… Nune ita Povo no Juventude kik no kiak Maubere hodi ita nia liman kroat Asuwain Falintil no Veteranus mai ita hotu hotu hamutuk no ambrik sorin ba sorin hodi kumu liman metin hasa’e ba lalehan katak ita nunka rende ba nain ulun a'at sira desisaun hirak ne'e konforme sira nia hakarak… Pelo contrario ita tenke hametin ita nia Unidade husi ita nia patriottismo no nationalismo hodi kaer rasik ita nia kuda talin, hodi buka ukun rasi ita nia a’an duni i la depende ba se tan no se tan deit iha mundo ne’e nia laran tomak… Ita nia Asuwain Kmdt Falintil L7 no Presidente do Partido Politico Resistente UNDERTIM ninia manifestasaun kontra planos ema a'at sira iha Governo AMP nia laran ne'e hatudu mai ba ita Povo kik no kiak Maubere katak sira buka tun no buka sae hodi halakun ita Povo Maubere kik no kiak nia dignidae no identidade hanesan Povo no Nasaun lolos iha mundo ne nia laran... Falintil kah Veteranos Funu Nain sira ne'e la'os buat ida ke nain ulun sira hodi atu buka halimar ba serbi sira nia kaprisius kah, intereses familia nia kah, kah ba sira nia grupu parasitas politikus lubuk ida ninia hakarak... Maibe FALINTIL kah VETERANOS ne'e embriaun alias aliserse kah fundasaun Resistentes Funu Nain sira nia, hodi hasoru sistema kolonial portugues no ita nia invasor no agresor Indonesio sira iha tinan 475 nia laran liu ba kotok ne'e... Neduni lia fuan nain ulun mafiosos sira nia nebe ke atu buka aplika ba kontra ita nia Asuwain Falintil no Veteranos sira nia moris no dignidade i valor hanesan Libertador Nasaun RDTL nia no Povo Maubere nia ne'e laiha signifikadu historiku kah importante ba ita nia Asuwain Falintil no Veterranos nia moris no ba nia dignidade no identidade nebe ke representa Povo Timor Lorosae tomak liliu Povo kik no kiak Maubere mak horas ne'e dadauk sei susar no terus nafatin tanba nain ulun tiranos no imorais sira nia hahalok a'at hirak nebe mak ita hotu oin loron akompanha hela dadauk ne'e…

 

PARTE II

 

Nune sira hakarak halai to'o iha nebe lós mak ne'e??? Ita Povo Timor Lorosae nia oan tomak sei tau matan nafatin ba sira nia hahalok hirak nebe ke hodi objektivu a'at no dala ruma husi sira nia patraun estrangeiros sira nia dorongnan atu buka halakun ita Povo Maubere kik no kiak nia habut ba ikus mai sira bele hamutuk oh sira nia patraun teberai nafatin hodi kokotek no hakarak hanean ita Povo kik no kiak nain sira, atu halo ita sai nafatin sira nia atan nune sira bele iha possibilidade barak bele susu ita bokor no rai bokor tuir sira nia hakarak iha ita nia rai doben Timor Lorosae nia laran... Bahinra sira halakon ita nia habut Falintil no Veteranos sira, konserteza katak laiha tan ona lian barani ida ke bele manifesta hasoru sira ninia hahalok a'at hirak ne'e... Nune sira sente katak sira mak sai fali rai doben Timor Lorosae nia nain i inverte politika Rai Nain menjadi pendatang i ema sira nebe ke la'o rai sira mak menjadi fali Rai Nain, politika ne'e ita hare lolos no momos kona ba ita nia maluk Povo Fiji nia destinu nune mos iha Vanuatu no Australia i nune mos iha fatin selu seluk tan iha Mundo ne'e nia laran mak ita hotu hatene no moris oh dadauk to'o oin loron ne'e... Nune hodi forum ida ne'e, ami bolu atensaun ba Povo Timor Lorosae nia oan murak hotu liliu Povo kik no kiak Maubere nia oan sira tomak hodi loke matan no loke tilun atu akompanha planos a'at sira nebe ke governantes AMP sira halo dadauk iha horas ne'e nia laran atu buka halakun ita nia forsa politika no ita dignidade humana, valor moral no identidade hanesan Povo Maubere duni iha Mundo ida ne'e nia laran... Povo kik no kiak Maubere keta toba demais oh ema a'at sira nia aimoruk midar atu halo imi matan dukur ba beibeik hodi toba demais liu... Tanba, bahinra ita toba demais ema a'at sira sei kapa ita mori-moris deit iha ita nia toba fatin i ita la halo buat ida hasoru sira... Nune, horas to'o ona, ita tenke hader hodi ambrik oh neon no aten barany no laran metin ba malu dean ba ita nia oposisaun politika hodi ita nia determinasaun no firmeza politika nia lian mak ita haktuir mai ne'e ... "Ami Povo Maubere kik no kiak lakohi tan menjadi imi nain ulun a'at sira nia kuda reino kah hodi kaer lilin atu serbi imi hanesan imi nia atan nune hodi hakruk nafatin ba imi tuir imi nia gostus satanikus sira nia ne'e, ida ne'e mak laek ona"... Agora ami Povo kik no kiak Maubere nia loron to'o ona hodi kaer rasik ami nia kuda talin duni, nune ami duni mak tenke ukun rasik ami nia a'an i ami lakohi ema seluk kah nasaun seluk atu manda fali ami hanesan sira nia bonekus...

 

Viva Povo Maubere! Viva Juventude Maubere! Vivam os Asuwains e Gloriosas Falintil e Veteranos da Resistencia Armada! Viva Matadalan Povo kik no kiak Maubere iha Rai doben Timor Lorosae nia laran tomak! Hakfulak no haksolok ba imi hotu mak ami hadomi no respeita i ami hodi hato'o ba imi hotu ami nia saudasoens kombativas i ita tenke laran metin ba malu ba ikus mai ita mak tenke kaer rasik duni ita nia kuda tali nune mos ita mak tenke ukun rasik a'an duni i ema seluk no ema let la iha direitu atu manda tan ita iha ita nia rai doben Timor Lorosae nia laran tuir sira nia hakarak no gostus pateta alegre sira nia... Husi imi nia maun no alin, aman no oan, nahan no lahin, kamarada no kompaneiro, ran maluk no mane maluk Maubere Tuba Rai Metin…